Network
KABARCIREBON - Ciduh ge acan tuus, asa kamari ieu ngalaksanakeun pilihan teh ayeuna geus rek pilihan deui. Geuningan lembaga pamilihan ayeuna keur tatan-tatan pikeun nyiapkeun sarana katut prasarana kalengkepan sejenna sangkan proses pilihan dina geprakna engke aya dina lungsur-langsar.
“Heueuh nya Tong, asa saserelek pisan ti pilihan ka pilihan teh. Najan dampak tina pilihan ge tacan leler keneh, bakal katumbu ku masalah anyar deui. Rarasaan teh kitu jeung kitu bae nya Tong, teu kaur akur jeung pada batur. Dalah kabudag-badug jeung urusan pulitik mah harese lelerna,” cek Mang Suadma.
“Atuda demokrasi di lembur urang mah teu acan siap Mang. Para kontestan teh kedah gaduh pamadegan, siap meunang, siap eleh. Buktina nu tacan siap mah angger we aya keneh gantar kakaitan,” walon Si Otong.
Baca Juga: Empat Kali Ikuti Seleksi Terbuka JPT Pratama Kuningan selalu Masuk Tiga Besar Sudah Biasa
“Bener pisan andika Tong. Atudan entong boroning keur tingkatan rayat leutik, dalah pangagungna oge jiga aya keneh nu ngaganjel dina hatena. Buktina masih keneh ngawilah-wilah lawan pulitik.
Malah kanu netral ge jiga nu teu empan, padahal netral teh hade, tapi cek pulitik mah angger we goreng, kudu ngeblok bae ka manehna. Teu bisa atuh ari sajagat gorombyangan kudu ngeblok ka manehna kabeh mah!” tembal Mang Suada.
“Duka teuing atuh Mang, abdi mah teu patos ngartos ari kana urusan pulitik teh. Atuda anu bersebrangan dianggap lawan tur dihewaan. Masing teu dikedalkeun ge da karasa, sugan ari jalma teh teu boga rasa. Anu puguh mah masing teu nyarita oge beda da karasana sabab katingali semonna ari kanu teu resepeun mah,” omong Mang Suadma.
Baca Juga: Pimda Nyawah di SDN 17 Kuningan Membangun Pendidikan Karakter bagi Siswa
“Numawi urang mah jalma leutik, teu kedah pupulitikan. Nu penting jadi warga nagara anu hade, nyalurkeun aspirasina luyu jeung gerentes hate kalawan obyektip, tanpa aya maksud sejen, iwal ti hoyong aya dina kamajuan sadaya,” tembalna.
“Da alusna mah kitu. Tapi buktina nu dianggap teu ngadukung ka manehna teu kuat ruah-raeh ku basa hapa-hapa acan. Cik da ari basa teh teu meuli ieuh, jiga nu teu empan we nenjo jalma nu cop jeung hatena teh, kagila-gila teuing,” Omongna.
“Leres pisan eta mah Mang, da karaos ku abadi ge, pedah teu sosongkolan ngadukung manehna dianggapna jalma papalingpang we. Ulah waka dadah-duduh atanapi goreng sangka ka jalma, can karuhan boa-boa anu ku urang dicap goreng teh jalma nyekel bebener.
Baca Juga: Sebelum Dilantik Bupati Kuningan, PPPK SMAN Ciniru Malah Keburu Dipanggil Sang Maha Kuasa
Pendukung jeung lain pendukung ari geus jeneng mah eta teh rayat urang, rek deog, rek pengkor, sarua jeung anak sorangan. Lebah mana ngarugikeunana, apanan rayat urang oge anu rajin mayar pajeg, tara nyieun kaonaran di lembur, tara ngarugikeun batur naha dihewaan? Nya pedahnaha?” taya Mang Suadma. (Kang Emsul) ***
Dapatkan informasi terbaru dan terpopuler dari Kabar Cirebon di Google News
