Network
TEUING Jumaah iraha rek aya perputaran jabatan teh. Asa geus cangkeul beuheung sosonggeteun ngadagoanana oge da teu jol teu jol. Baruk saban poe Jumaah itung-itung ngalap Jumaah berekah. Ari ngalieurkeun jalma rea mah lain tambah berekah, muga-muga ulah matak jadi musibah. Lain musibah bencana alam, tapi mun maksakeun nempatkeun pejabat anu lain ahlina dina pagaweanana, apanan kari nunggu kaancuranana. Nauzubillahimindzalik…!
“Naon hesena ukur nempatkeun jalma pikeun ngeusi kakosongan jabatan, bari jeung kudu utang itung tai lutung, sulap selip susulapan, susu meong nyalap dalapan, cek cohagna. Hartina loba teuing uget, bari jeung hasilna can karuhan bener, dhoh…….sugan mah,” cek Mang Suadma.
“Atos…atos….Mang, masing nyarios dugi ka ngabudah atanapi ngaburubus sapertos sitrun oge, upami saur anu gaduh kawenangan kumahacek uing, nya kana bolay (gagal) deui bae,” walon Si Otong.
“Heueuh nya Tong, mending keneh anjen mikir teh sistimatis, paktis tur teu jenuk teuing uget. Ari hasil kitu keneh kitu keneh mah, mending mendah aya mutasi pisan. Tapi lamun konsep andika dipake najan teu saratus persen hade, meureunan aya nu nyangcet, deukeut-deukeut kana kana hasil mutasi teh. Atuda kumaha ieu mah uggal aya mutasi (enggeusna) pasti saheng,eta teh nandakeun anu nu teu luyu jeung prinsip nu sakuduna,” cek Mang Suadma, panjang lebar.
“Ah … duka teuing, Mang. Abdi mah teu bodo-bodo acan atuh di lembur oge jabatan teh teu RT-RT acan, tangtos moal aya nu merhatoskeun sanaos eta kamandang aya nu saena oge. Margi nu ditingalina benten, sanes realitas di lapangan sareng nu dipiharep balarea. Upami kitu carana, nya kamana poharana upami tambih saheng tur harengheng,” cek Si Otong.
“Heueuh nya Tong, tah kitu akibatna lamun ngurus lembur ku sorangan teh. Sagala rupana asa pangbenerna cek sorangan. Padahal ari nu disebut bener teh aya opat perkara. Bener cek sorangan, bener cek umum, bener cek nagara katut bener cek agama, Isnya Alloh salamet. Lamun urang salawasna nyekel kana eta papagon anu opat perkara, hirup urang bakal tiis ceuli herang mata, moal aya gugup ripuh banca pakewuh,” tembal Mang Suadma.
“Duka atuh Mang, manawi tos kedahna kitu. Upami nu tibalik hoyong dianggap sae, malihan bawahanana kalah ka mangmeunangkeun najan pamadegan dunungan goreng patut oge. Atuda nu penting ari bawahanana parahi nyalametkeun diri, Mang!” tembal Si Otong.
“Heueuh buktina saperti rek mutasi ayeuna waktuna terus ngayayay saperti anu keur pabetot-betot jeung kapentingan. Ari pabetot-betotna ukur kapentingan kelompok, golongan jeung papada manehna mah, nya erek iraha reugeujeugna ieu lembur teh. Aya alusna mun pabetot-betotna demi nanjeurkeun bebener pikeun kamamuran rahayat. Tapi kumahamun ukur marebutkeun kapentingan sirit jeung peujit? Ulah sambat kaniaya, isuk jaganing geto bisi aya gugup ripuh banca pakewuh, ulah nyalahkeun sasaha, tapi tanya ka diri sorangan,” pungkas Mang Suadma.(Kang Emsul/KC)
