Network
Teu sirikna unggal usik, anu digugulukeun teh ngan urusan duuuiiiit… bae. Belaan tisuksuk tidungdung nyiar kabutuh keur kahirupan, teu nu miskin, pon kitu nu beunghar kalah tambah sarakah. Teu aneh lamun aya anak kalantar dina widang pendidikanana lantaran indung bapana tungkul bae kana haliah dunya. Nu miskin ku kamiskinana lir nu ngeunghar sibuk ku kebeungharanana.
“Antukna ku kasibukan kolot neangan duit, teu saeutik nu boga budak diurusanan ku pembantuna. Ongkoh jalma teh palinter, tapi lebah ngadidik budakna kalah diserenkeun ka badegana (pembantuna), da indung bapanba sibuk tea,” cek Mang Suadma.
“Leres oge nya Mang, kumaha bade janten anak soleh tur solehahna upami pendidikanana dipasrahkeun ke badega anu intelektual rendah,” tembal Si Otong.
“Rek kumaha generasi bangsa kahareup lamun aya keneh nu ngadidik budak ku badega. Ngaranna oge pembantu, ukur keur ngabantu-bantu, lain pagawean utama keur ngadidik budak. Numatak rea budak nu mantangul oge atuda anu ngadidikna sasat deungeun-deungeun belegedegan anu teu nyaho naon-naon, hususna dina widang edukasi jeung sabangsana,” omong Mang Suadma.
“Atuda sanes bagianana badega ngadidik budak mah. Sanes ngarendahkeun harkat darojat badega, punten. Numawi nu janten sepuhna ulah mercantenkeun teuing kanu ngasuh dina urusan jeujeuhan,” walon Si Otong.
“Atuda kumaha hirup di jaman now mah, budak asal anteng cukup dibere HP nu pinuh ku gambar teu paruguh,” tembal Mang Suadma.
“Abdi mah manghawatoskeun, Mang. Leuheung basa dina jero HP teh gambarna anu sipatna ngadidik, lebah anu matak ngaruksak moral, apanan matak ngajantenkeun bangbaluh ke eta murangkalih,” cek Si Otong.
“Heueuh bener andika, ayeuna mah kolot eleh ku budak. Ari kana pangajaran atawa dititah ngapalkeun ngedul pisan. Lebah ngoprek HP beak beurangna, parat peutingna, jeh…. diantep karep we ku indung bapana teh,” cek Mang Suadma.
“Bayaha atuh Mang?” tanya Si Otong, singget.
“Heueuh, saking antengna, heug kabuka gambar unyil, anu keur tingaruget, nya rek kumaha lalampahan generasi bangsa ka hareup?” tanya Mang Suadma.
“Hawatos abdi ge Mang, eukeur mah hasil didikanana ku pembantu, katurug-turug dipasihan HP anu eusina sanes tingaleun murangkalih, langkung ti bahaya,” tembal Si Otong.
“Kumaha rek tumerapna pangajaran budi pekerti, nancebkeun pendidikan karakter ka anak didik urang jeung sajabana, lebah budak dibebaskeun nyonyo-o HP teu puguh waktuna. Heug-heug bae ngagolangkeun eta alat teknologi moderen asal keur nambahan elmu jeung pangaweruh. Ulah sambat kaniaya, upama isuk jaganing geto anak incu urang teu reugeujeug akibat kamalinaan ngagolangkeun eta alat, ulah nyalahkeun sasaha. Bongan anggota kulawargana anu teu bisa ngamangpaatkeun eta tehnolohi demi kamajuan hirup.(Kang Emsul/KC)
